মুক্তিলাভ কৰিলে ‘জানমনি২০২৩’

 মুক্তিলাভ কৰিলে জানমনি-২০২৩

   জানমনি। জানমনি বুলি ক’লেই আমাৰ মনটো ঘূৰি যায় আজিৰ পৰা বহু বছৰ আগলৈ। অসমীয়া VCD জগতৰ দিনত অসমৰ সকলোৰে বুকুৰ আপোন হৈ পৰিছিল জানমনি। ঠিক আজিও তাৰ বিপৰীত নহয়। আজিও সেই জানমনিৰ জনপ্ৰিয়তা একেই আছে। আজিও জানমনি আমাৰ সকলোৰে আপোন হৈ আছে। আজিও বিহু বুলি ক’লেই জানমনি আৰু জানমনিৰ সেই জনপ্ৰিয় গানবোৰলৈ মনত পৰে। ৰাইজে মুখত গানবোৰ গুণগুণাবলৈ ধৰে। 

   ৰাইজৰ জানমনিলৈ থকা সেই মৰম আৰু আদৰৰ কথা ভাবিয়েই হয়তো NK Productionৰ বেনাৰত পুনৰ নিৰ্মান হৈছিল জানমনিৰ। আৰু সেই আগৰ বিনবোৰত যেনেকৈ বিহুৰ আগে আগে জানমনিৰ আগমন ঘটিছিল, ঠিক তেনেদৰেই এইবাৰো নতুন ৰূপত দৰ্শকৰ বাৰে প্ৰস্তুত কৰা ‘জানমনি ২০২৩’ৰ প্ৰথমটো খণ্ড কালি NK Production ৰ YouTube Channel ত মুক্তি লাভ কৰে।

    বৰ্তমান সময়ত নিৰ্মাণ কৰা জানমনিৰ কাহিনীৰ পটভূমি আজিৰ পৰা বহু বছৰ আগৰ যদিও ধাৰাবাহিক জগতৰ এজন সুলেখক, চিত্ৰনাট্যকাৰ, সংলাপ লেখক প্ৰণৱ বৰুৱাই সুন্দৰ ৰূপে প্ৰস্তুত কৰি উলিয়াইছে। য’ত কাহিনীটোৰ দ্বাৰা আমি আজিৰ পৰা বহু বছৰ আগতে পাৰ কৰি অহা দিনবোৰৰ একোখন ছবি আমাৰ চকুৰ সন্মুখত ভাঁহি আহিছে। 

    ‘জানমনি২০২৩’ৰ প্ৰযোজনা কৰিছে দেৱ বৰকটকীয়ে। পৰিচালনা  কৰিছে জনপ্ৰিয় নৃত্য পৰিচালক উদয় শংকৰে।

    ন-ৰূপত মুক্তি লাভ কৰা জানমনিত অভিনয় কৰিছে— জ্যোতি ভূঞা, অৰুণ হাজৰিকা, অমিতাভ ৰাজখোৱা, বিজিত চৌধুৰী, বিশ্বজ্যোতি বৰকাকটি, জিটু মহন্ত, নীলা শইকীয়া, অদিটি বৰুৱা, অংশুমান ভূঞা, প্ৰীতম যোগী, আমজাদ খান, ইণ্ডাৰ চৌধুৰী, ৰাজমণি ভূঞা, অবিনাশ কাশ্যপ, ইমন নাথ, বাবু দাস, নৱনীত নিলাভ, উদেষ্ণা বৰুৱা, অঞ্জু হাজৰিকা, অষ্ট্ৰিয়ানা দিহিঙীয়া, কুঁৱলী হাজৰিকা, লাভলী দিহিঙীয়া, নিৰূপম  কোঁচ, নিৰঞ্জন ফুকনে আদিকৰি বহু কেইগৰাকী নৱীন-প্ৰৱীন অভিনেতা অভিনেত্ৰীক দেখিবলৈ পোৱা গৈছে।

    ন-ৰূপত জানমনিক অসমৰ দৰ্শকক উপহাৰ দিয়াৰ বাবে ‘জানমনি’ৰ পৰিয়ালক ধন্যবাদ জনালোঁ। অসমৰ দৰ্শকৰ মাজত জানমনিৰ জনপ্ৰিয়তা সদায় বাঢ়ি গৈ থাকক। লগতে পৰৱৰ্তী সময়ৰ বাবে নৱীন অভিনেতা-অভিনেত্ৰী সকলক শুভেচ্ছা জনালোঁ।

~সাগৰ সংগম দিহিঙীয়া